Варшаўская пракуратура расследуе смерць Мікіты Мелказёрава

Журналіст Мікіта Мелказёраў памёр у ноч на 21 снежня ўдома ў Варшаве.

Прэс-сакратар Акруговай пракуратуры польскай сталіцы Пётр Антоні Скіба паведаміў «Белсату», што 22 снежня пачалося расследаванне справы аб ненаўмысным забойстве:

– Гэта традыцыйная фармулёўка, якая даецца ў сітуацыях, калі прычына смерці невядомая. Будзе праведзенае анатамаванне – мы не ведаем, калі дакладна, магчыма, гэта будзе яшчэ да Калядаў. Не выключаю, што паспеюць да Новага года.

Спікер пракуратуры адзначыў, што праваахоўныя органы будуць абнародаваць толькі тыя звесткі ў гэтай справе, якія адпавядаюць інтарэсам сям'і нябожчыка:

– Цела ў цяперашні момант застаецца ва Установе судовай медыцыны Варшаўскага медычнага ўніверсітэту, і гэты аб’ект будзе выконваць ускрыццё. З увагі на зацікаўленасць медыяў мы будзем імкнуцца абнародаваць звесткі, якія не супярэчаць інтарэсам сям'і загінулага.

Далейшыя працэсуальныя дзеянні залежаць ад вынікаў судова-медычнай экспертызы. Усё залежыць ад таго, што стане вядома пасля ўскрыцця.

Звычайна анатамаванне праводзіцца цягам двух тыдняў.

– Магчыма, вынікі з’явяцца раней. Мы ўжо тэлефанавалі ў судмедэкспертызу з просьбай, каб зрабілі ўсё як мага хутчэй, – сказаў Скіба.

Ён таксама паведаміў, што пакуль у сувязі са смерцю была апытаная толькі ўдава Мікіты і што галоўная версія следства цяпер – негвалтоўная смерць:

– На гэтым этапе мы бярэм пад увагу, што смерць магла адбыцца з натуральных прычынаў, але ўсё гэта праверым шляхам паслядоўнага збору доказавага матэрыялу.

Мікіту Мелказёраву было 37 гадоў. Ён аўтар і суаўтар праектаў «Жыццё-маліна», «Загляне сонца» і падкасту «Нешта будзе», сувядоўца праграмы «Мова нанова» на «Белсаце».

Паводле крыніцаў Reform.news, Мікіту стала блага ўвечары 20 снежня. Ён адляжаўся, адчуў сябе лепш праз некаторы час. Затым устаў і знянацку знепрытомнеў. Як неафіцыйна паведамляецца, нешта здарылася з сэрцам.