Скура, чад і пакемоны: як байкеры сустрэлі вясну

Сотні брутальных байкераў і пікантных байкерш на матацыклах самых розных калібраў з’ехаліся да польскага Аўтамотаклубу на захадзе сталіцы ў раёне Бемова.

З пункту гледжання сярэднестатыстычнага беларускага сілавіка, на каго ні глянь – бадай, усе абсалютна ненадзейныя і падазроныя тыпы: у татуіроўках, скураных касухах з заклёпкамі, з голенымі патыліцамі. Маскі блазанскія на шлемы панацягвалі, дзяцей на свае пякельныя машыны панасаджалі... А некаторыя нават палітычныя лозунгі замест нумароў папрыкручвалі!

Але ў выніку ўсе гэтыя страшныя людзі дысцыплінавана пашыхтаваліся, адстаялі купкамі на светлафоры і рушылі на цэнтральныя вуліцы Варшавы раўці маторамі. Ну не мілата?

Праехаўшы праз цэнтр, байкеры фінішавалі ў раёне Ўрсынаў, дзе ўсіх ахвотных чакаў пікнік з бясплатнай раздачай гарохавага супу і кілбасак грыль з палявой кухні ды з іншымі гастранамічнымі цікавосткамі.

«Салідарнасць» пакуль сваім «харлеем» не абзавялася і, на жаль, да гэтых смакоццяў не дабралася. Але ж сезон толькі пачынаецца!